Aizawl, Feb 28 : Mizoram hi mikhual party-in an rochun hlen atan Pathianin a phal ka ring lova; 'Pathian leh kan ram tan' titu chuan tuna Congress ni lo party hrang hrangte pawh hian huaisen taka he kawng hi an rawn zawh ve ngei ka duhin ka beisei bawk a ni,’ Pu Zoramthanga chuan a ti.
Nimin Mizoram Congress Party-te MNF-ah an inchhunluhna in-khawm, Hnam Run-ah neihah MNF President Pu Zoramthanga chuan, MNF hian a din tirh atangin hun harsa leh khirh tak kan lo tawn tawh a, a changin Malsawmna-te'n min vur a.
Vawiina MNF-in hun harsa leh khirh tak kan tawn lai buhto zawn hun laia rinawm taka MCP-a lo awm thinte nen kan inchunfin thei hi nakina Malsawmna kan dawnna tura kawng sialtu a nih ngei ka ring," a ti a.
Harsatna tlingkhawm an tawn mekte hi party dangte nena la thuikhawm a, thawhhona kawng hawngtu a la nih ngei a beisei thu a sawi bawk.
MCP President Pu L.T. Zothankhuma pawhin MNF chu an thawhpui an nih vang ngawta in-chhunglut an nih loh thu sawiin, ram changkang-a an tih anga party pahnih chauh, National leh Regional Party (MNF leh Congress)-a awm mai hi thaa an hriat bakah party hrang hranga inbawk hrang fir fer lova awm hi ram tan a that an rin vang zawk a nih thu a sawi a. Congress ni lo party hrang hrangte pawh hian huaisen taka he kawng an zawh ve ngei a duhin a beisei thu a sawi bawk.
[aizawl.org]
