Mizoram khawpuia cheng kum 15-49 inkar hmeichhia 13.6% te chuan meizial an zu thin a, thingtlang hmeichhia 19.4% ten meizial an zu thin bawk. Khawpuia cheng mipa 74.5% in mei an zu a, thingtlang a cheng 72.5% in mei an zu bawk. Tichuan a pumpuiah hmeichhia 16.1% in mei an zu a, mipa 73.6% in mei an zu bawk a ni. Kuhva, sahdah leh hetiang lam chi hi khawpui hmeichhia 49.8% in an ei/hmuam a, thingtlang hmeichhia 61.7% in an hmuam bawk. Khawpuia cheng mipa 29.8% in kuhva, sahdah hi an ti thin a, thingtlanga cheng mipa 47.9 % in hetiang hi an ching bawk a. Tichuan a pumpuiah hmeichhia sahdah, kuhva ei thin chu 55% an ni a. Mizo hmeichhia zatve aia tam zetin an hmuam/ei thin tihna a ni. Mipa 38.1% chuan kuhva, sahdah hi an hmuamin en ei ve a, hmeichhia ai chuan an tlem deuh zawk tihna a ni.
Khawpui hmeichhia 0.7% in zu an in ve thin a, thingtlang hmeichhia 0.9% in zu an in thin bawk. Khawpui mipa 43.3% chuan zu an in thin a, thingtlang mipa 40.5% chuan zu an in thin bawk. Tichuan Mizo hmeichhia 0.7% in zu an in thin a, Mizo mipa 42% in zu an in thin tihna a ni bawk. Mizo mipa zatve deuhthaw chu zu in ve thin an ni tihna a ni. Amaherawhchu, a tam zawk hian an in regular lem lova, nitin-a zu in thin chu khawpui mipa 5% vel chauh an ni a, thingtlang mipa 6.4% in an in thung a, tichuan Mizo mipa 5.6% hian nitin zu in thin ang an ni. Karkhata vawikhat in zauh thin hi khawpui mipa 36.9% an ni a, thingtlang mipa 16.8% an ni thung a, tichuan Mizo mipa kar khata vawikhat zu in zauh thin hi 28% an awm a ni.
Karkhata vawikhat pawh in tling lo, engemaw changa in ve zauh thin hi khawpui mipa 58.2% an ni a, thingtlang mipa 76.8% an ni thung. Tichuan Mizo mipa zu in ve zeuh thin chu 66.4% an ni tihna a ni.
He data hi National Family Health Survey-3 (2005-2006) in a tarlan dan a ni a. Hetiang hian Mizo ten zuk leh hmuam an tih nasat dan chu an khaikhawm a ni — Mipa 5 zinga 4 (83%) leh hmeichhia 5 zinga 3 (61%) chuan vaihlo kaihhnawih thil an hmuam/ei/zu a, mipa in meizial an zu nasa zawk a, hmeichhiain sahdah, khaini leh kuhva an ei nasa zawk a ni. Zu in aiin hetiang zuk leh hmuam lam hi a mipui nawlpui hian an ti nasa zawk , mipa 5 zinga 2 (42%) chuan zu an in thin a, hmeichhia 1% pawh tling mang lovin zu an in ve thin bawk niin an tarlang a ni.
