Feb ni 23 a Central YMA CEC meeting chuan, internet-a mualpho taka YMA hming tarlan a nih avang leh Mizo inpumkhatna leh inunauna tichhe thei thil tam tak ziak a nih avangin March thla chhung ngei hian hnamdang (foreigner) a bikin Myanmar atanga lo chhuk pawl hrang hrang hruaitute koh khawm a tum a, YMA branch zawng zawngte chu foreigner census neih tir an tum bawk.
He thu ziak chung chang hi The Zozam Times chuan February 24 chhuak ah hetiang hian an tar lang a ni. Internet website pakhat Human Rights Watch-ah chuan ‘Life for Chin in Mizoram’ tih January 27, 2009-a post-ah chuan Mizorama Burma mi nia kan sawite dinhmun hrang hrang tarlan a ni a. Lung In tang (prisoner) ang mai kan ni, tiin an sawi chhuak a ni. He thuziak hi thui tak niin kum 2003-a YMA hmalakna leh Mizo mipui-ten an en dan kimchang taka tarlan a ni a. Chin Refugee pakhat chuan, India ramah hian lung in tang ang maiin kan awm a, zalenna kan nei lova, pawisa kan nei lova, chhungkaw enkawl theih-na tur pawh sum kan thawk chhuak thei lo a ni, tiin a sawi.
Chin hmeichhe pakhat, Mizoram chhunga awm chuan, Mizo te chuan pawisa min dil thin a, kan pek loh chuan police hnen-ah emaw YMA hnenah emaw an hriattir a, a vuak te pawh min vaw hial thin. He hmun hi kan tan chuan hremhmun ang chiah a ni, kan hmel atang ringawt pawhin inthliar-na (discrimination) a awm a, keimahni pawh kan in venghim zo lo a ni, tiin a sawi ve bawk.
Chin hmeichhe pakhat vekin, hlau leh harsa reng rengin nitin hun kan hmang a, YMA te hi kan hlau em em a, chuti chung chuan Burma rama thawnhaw (deport) ai chuan Mizo-rama thih chu kan thlang zawk lo thei si lo, tiin a sawi ve bawk.
He website-ah hian Chin mite chu kum 1988 a tangin Mizoram-ah an tla thla tan a, enkawlna (accomoda-tion)tha engmah an dawng lo angin a ziak a ni. Kum 2000 khan YMA chuan Chin mi 1000 a hnawt haw a, kum 2003 khan mi 10000 chu a nawr haw lui bawk niin an tarlang.
Haw tura an tih te chu Human Rights Watch chuan interview in, mi 22 an kawm zinga 16 te chuan YMA in haw turin a ti lui niin an sawi a, chutiang chuan sorkar thuneitute leh YMA tang-kawp chuan mi 10000 chuang a thawn haw lui niin an tarlang bawk a ni.
In luah tur zawn kawngah harsatna an tawk tih an sawi a, VC lehkha a ngai an ti a, kan neih si loh avangin man to tak taka kan luh a ngai a ni, an ti. Lehkha zirna lamah pawh, Mizoram mi dik tak a ni em? tih a ni zel bawk niin an sawi. Chin Fellowship Lunglei a member pakhat chuan, Mizo te chu Kristian deuh vek an ni chungin a hranpa a Biak in kan neih ve an phal lova, YMA member te chu kan chenna in-ah lo kalin a hrana inkhawmna nei tawh lo turtein min hriattir thin a ni, an ti bawk.Police te chuan tihluihna in kan Biak In te min khar sak a, tlawmngai pawl thenkhat lo kalin kan tawnga inkhawm kan kaih-hruai an phal lova, Mizo tawng chauh hmang tur tein min ti a ni, an ti a. YMA chuan, Chin mi reng rengin a hranpain Biak In an nei ve tur a ni lo tih a puang nite in an sawi a ni.
He website a tarlan a nih dan chuan March 2008 thleng khan Mizoramah chin mi 75000 - 100000 vel an awm niin a tarlang a. Heng mite hi kawng hrang hranga enhran leh tih duhdah an ni a, YMA chu pawllian tak niin member 350,000 vel nei a ni a, an thupui ber chu, ‘conservation of Mizo culture & herritage’ tih a ni tawp mai niin an tarlang a, heng harsatna an tawh hrang hrangah hian YMA chu a meizanghlaptu berah an puh a ni.
[buannel]
Probe demanded into teacher recruitment scam
9 years ago
