Aizawl, March 12: Mizoram hmun hrang hrangah ei leh bar zawnna atan tlangram lo neih (shifting cultivation) chu bansan hleih theih lohin a la awm a, mithiamte chhut dan chuan Mizoram chhungkaw zaa sawm sarih vel lai chuan tlangram lo neih hi innghahna atan an la hmang niin a lang a, ngaw tha leh thingte a chereu chhoh zel avangin Mizoram boruak pawh a chhe zual zel a, Pollution Control Board lamin an teh dan chuan Aizawl khawpui bik hi a kum telin boruak a chhe chho zel a, chemichal thalo sulphur dioxide leh nitrogen oxide a tam tial tial tih an sawi.
Mizoram sawrkar chuan kumin atana lo hal ni hnuhnung ber chu March ni 15 a nih tur thu a lo puang tawh a, hemi hma hian tlangram lo neitute chuan vahchap chu an hal vek tur a ni tiin thuchhuahah chuan tarlan a ni.Tun kar Inrinni thlengin vahchap hi hal theih a ni a, tun kar chho phei chuan thingtlang lam chauh pawh ni lo, Aizawl chung boruak a bal hle a, zan lamah phei chuan thla eng pawh a sen dul deuh ruih a, hei hian boruak bawlhhlawh zia a tarlang niin a ngaih theih.
"India ram pum tehna nena khaikhin chuan Aizawl boruak hi chu a la chhe lo hle a, mahse tun hmaa boruak tehna kan hman tirhte kha chuan sulphur dioxide leh nitrogen dioxide hian tehna hi a tichhe pha meuh lo a, tunah chuan heng tehna hi a che nasa tawh hle a, boruak hi a bawlhhlawh tawh hle," tiin Pollution Control Board secretary C Lalduhawma chuan a sawi a.
A sawi chhunzawm zelnaah chuan heng chemical chi hnihte hian natna a thlen thei tih a sawi a, "Thawhah, Asthma leh hrawk zate pawh a thlen thei a ni," tiin a sawi.
"Aizawl atang chauhin kan teh a, thingtlang lam lo hal kha tlem azawng kan dawng ve a ni mai a, heti chung hian boruak hi chu a tehna kan neih tirhte nen chuan a inthlau hle a, a hmain Aizawl boruak thianghlim tak lo hip thang tan chuan in ‘adapt’ zung zung a har a, India ram hmun dang ang em chu ni lo mahse kan dinhmun hi a chhe zawng chuan a kal hrim hrim a ni," tiin secretary chuan Evening Post a hrilh bawk.
India ram standard nena khaikhin chuan pollution hi la sang lutuk lo mahse tunah chuan tehtham a awm ve tawh tiin thudawnna chuan a sawi bawk.Tun hnai boruak chhe leng vel chungchangah Aizawl Civil Hospital Superintendent Dr Lalbiakkima chu biak pawh a ni a, ani chuan, "Natna tlanglawn thawhhahte chu a awm niin kan observation atang chuan a hriat theih a, abikin tlang hrileng hi naupang leh kum upa lamah a zual bik a, asthma te pawh a kaitho thin," tia sawiin hemi chungchang hi chiang taka statistic nena an la neih loh thu a sawi a, "Statistic nena teh thin kan ni a, tunah chuan statistic hi kan la nei chiah lo a, mahse kan observation atang chuan natna hi chu a awm niin kan ngai," tiin Evening Post a hrilh bawk.
Tlangram lo neih vanga Aizawl boruak a chhiat theih chuan Mizoram pum boruak pawh chhiat phah hle tura ngaih a ni.
