Aizawl: Mizoram chief secretary hlui tuna Delhi (NCT)-a financial commissioner-a awm mek Haukhum Hauzel chu Election Commission of India thu angin Goa chief secretary atan ruat a ni.
"A order-ah pawh ‘as per the direction of the Election Commission of India’ tih a nih avangin Lok Sabha inthlan tur a ni bawk si a, rei rial lova kal leh vat chu a ngai ngei dawn a ni," tiin Haukhuma chuan Evening Post zawhna a chhang."Cadre post a nih avangin central-a deputation kal tur anga duh leh duh loh sawi theihna chi pawh a ni lo va, Lok Sabha inthlan dawn laia Election Commission of India thu, zawm thuai tura min tih a nih bawk avangin a rang thei ang bera kal tur ni mai awm a ni a, tun kar chhung chuan thlen hman a ngai ang chu," a ti. Tuna a hna chelh mek rei a la thawh hman loh chungchangah Haukhuma chuan, "Election comission lamin Goa chief secretary tur hming pe turin ministry of home affairs a va ti a, mi pathum hming an pekah commission lam chuan keimah min dah turin an lo ti ni awm tak a ni, an rawn sawi dan chuan," a ti bawk.
Mizoram assembly inthlan boruakah khan sorkar thar a pian ruala chief secretary thlak a nih tur thu sawi lawk thei sorkar thara challang tak tak te an awm avangin khatih laia CS Haukhuma kha thlak a nih tak chuk chukah pawh khan thil maka ngaih a ni lem lo. A chhan chu assembly inthlan zawh hlim December 5, 2008 khan MPCC Election Monitoring Committee chuan Haukhum Hauzel IAS, chief secretary; B Sangkhumi, chairman, MPSC; John Neihlaia MPS, AIG I; JC Ramthanga IAS, commissioner leh TBC Rozara IRS, commissioner te chu chief election commissioner address-in MNF party tana campaign-ah puhin heng mite chunga action la tur hian an phut a ni.
He lehkhaah hian Haukhuma hi November 18-20, 2008 khan Champhai leh a chhehvel, a bikin Hnahlan-ahte kalin khatih laia chief minister Zoramthanga tana a campaign-ah puh a ni a; Hnahlan-ah hian Paihte zirlai pawlte kokhawm a, Kawlkulh-ah pawh zirlai pawlte nena meeting neiah puh a ni bawk.
Hetianga CEC-a complaint thehluh a nih takah hian joint CEO chuan Haukhuma leh senior officer te chu insawifiah tur leh an insawifiahna hi Election Commission of India-ah thawn nghal tur a nih thu a hriattir nghal a ni.
Hemi chungchangah hian February 25, 2009-a Mizoram sorkar Election Directorate-ah RTI hmangin thil awmdan zawh fiah a ni a, Election Commission of India hian March 16, 2009 thleng khan thawm engmah a la neih loh thua chhan a ni.
Sorkar inthlak hian senior officer te thlak kual hi thil tih fo, tihdan phung mah mah te pawh a ni. Chutih lai mekin CS kalchhuak ta Haukhuma chungchanga thil awmdanah khan sawnchhuah a nih tur thu lo sawi lawk an awm leh MPCC Election Monitoring Committee-in MNF tana campaign tia ECI-ahte thu an lo thehluh bawk si nen titi a siam ta laih kha a ni a.
Campaign-a puh zinga mi JC Ramthanga phei chu an puh hunah hian a lo zin lo hlauh si a, hei hian midang puhna te pawh kha a ti rinhlelhawm ta reng a ni. Election commission-in inthlan kaihhnawiha acton lak tur reng renga thutlukna a siam zung zung laia MPCC Election Monitoring Committee thu thehluha thutlukna siam mai lo va Goa chief secretary atan Haukhuma dah tura home ministry a hriattir hi a chhanna ni mai awm tak a ni. Hemi chungchangah hian Haukhuma chuan zirlai pawl awm lo nena inkawmahte puh a nih avangin Election Commission of India hian an lo ngai pawimawh tawk lote pawh nia a rin thu a sawi. (Courtesy Evening Post)
